افتح الصندوق 📦
مو عن قطة شرودنجر الحية والميتة بنفس الوقت 🫣🐱
القطة الخارقة 🦸🏻♂️
في واحدة من اشهر نظريات ميكانيكا الكم، يصف «شرودنجر» هذا المشهد الغريب:
تخيّل معي ان عندك صندوق فيه علبة سم قاتل وفيه قطّة، وقفلت الصندوق. 🫣
هنا في احتمالين قابلة للحدوث، الأول إن القطة تكسر علبة السم وتموت، أو انها تبقى على قيد الحياة.
يقول شرودنجر إن الجواب على سؤال هل القطة حية او ميتة، هو انها ميتة وحية بنفس الوقت.
بينما يبدو هذا الجواب مو منطقي نهائيًا إلا إن كثير من نظريات ميكانيكا الكم انطلقت منه، مثل ازدواج طبيعة الفوتون وغيره.
ايش دخّل هذا كله؟ 🤨
ما علينا من هذا كلّه، خلونا ما نروح بعيد، اشوف ان مثال شرودنجر «ولو لم يقصد منه الاسقاط الي بكتبه» الا انه بشكل كبير يمثّل كثير اشياء في حياتنا.
كل الاشياء الي نخاف نعرفها فقط لأن احد الاحتمالات قد تكون سيئة لنا ونفضل اننا نخليها عالقة بحيث انها تبقى «عايشة وميتة» بنفس الوقت.
فكّر بدرجة الاختبار الي قررت ما تشوفها عشان ما تكون مو حلوة، أو السؤال الي قررت ما تسأله لأحد عزيز عليك عشان ما يخذلك جوابه. كل شيء قررنا ان عدم معرفته اريح بالنسبة لنا.
هنا اجي واقول ان شرودنجر ما كان على صواب في جوابه «على الأقل فيما ينعكس على حياتنا» فا مو بالضرورة إن عدم فتحك للصندوق راح يخلي القطة حية إن كانت كسرت علبة السم.
ومن جانب آخر فتحك للصندوق إما انه راح يخليك تعرف ان القطة ميتة وتنقذ ما تبقى ويمكن انقاذه، او يطمئن قلبك وتعرف انها بخير.
عدم فتحك للصندوق ما راح يمنع موت القطة وموت القطة ما راح يوقف حياتك، افتح الصندوق!
اخيراً المقال اعلاه ما كان له دخل بـ «شرودنجر» وقطته الي عايشة وميتة بنفس الوقت. وإسم المدونة ماله دخل بهذا المقال، بس اعجبني :)
